ყაზახეთის ენერგეტიკის სამინისტრომ დაადასტურა გეგმა, რომ 2025 წელს ბაქო-თბილისი-ჯეიჰანის (BTC) მილსადენით 1.7 მილიონი ტონა ნავთობს გადაზიდავს.
ამის შესახებ რესპუბლიკის ენერგეტიკის სამინისტროს ხელმძღვანელმა, ერლან აკენჟენოვმა განაცხადა.
მისი თქმით, 6 თვეში BTC-ით დაახლოებით 800 ათასი ტონა ნავთობი გადაიტანეს.
„ეს ჩვენი ერთ-ერთი მთავარი ალტერნატიული მარშრუტია. თუ 2024 წელს ამ მარშრუტით დაახლოებით 1.4 მილიონი ტონა ექსპორტი განვახორციელეთ, 2025 წელს დაახლოებით 1.7 მილიონი ტონა ნავთობის ტრანსპორტირებას ვგეგმავთ“, – განაცხადა ერლან აკენჟენოვმა.
აღსანიშნავია, რომ მიმდინარე წლის იანვარში ყაზახეთის ენერგეტიკის სამინისტრომ განაცხადა, რომ ყაზახეთის ნავთობის ექსპორტის დაგეგმილი მოცულობა BTC-ის მეშვეობით 2025 წელს 1.5 მილიონი ტონაა. თუმცა, თებერვალში, KazMunayGas-ის საბჭოს თავმჯდომარის მოადგილემ, კურმანგაზი ისკაზიევმა, ამ მაჩვენებლის 1.7 მილიონ ტონამდე გაზრდის შესახებ განაცხადა.
2024 წლის მარტში KMG-მ და SOCAR-მა ხელი მოაწერეს შეთანხმებას აზერბაიჯანის ტერიტორიაზე ნავთობის ტრანზიტის ეტაპობრივი გაზრდის შესახებ. დოკუმენტის თანახმად, მიწოდების მოცულობა წელიწადში 2.2 მილიონ ტონამდე უნდა გაიზარდოს.
2023 წელს აქტაუს პორტიდან აზერბაიჯანის მიმართულებით დაახლოებით 1.1 მილიონი ტონა ყაზახური ნავთობი გაიგზავნა BTC-ის მეშვეობით შემდგომი ექსპორტისთვის, 2024 წელს – 1.4 მილიონი ტონა.
შეგახსენებთ, რომ 2022 წელს KMG-სა და აზერბაიჯანის სახელმწიფო ნავთობკომპანიას (SOCAR) შორის ხელი მოეწერა ყაზახური ნავთობის ტრანზიტის შესახებ ზოგად შეთანხმებას. 2023 წლის მარტში განხორციელდა ყაშაგანის საბადოდან აზერბაიჯანის გავლით 7 ათასი ტონა ნავთობის სატესტო გადაზიდვა.
