პრემიერ-მინისტრმა კირ სტარმერმა თემთა პალატაში სიტყვით გამოსვლისას განაცხადა, რომ დიდმა ბრიტანეთმა ისრაელთან თავისუფალი ვაჭრობის შესახებ მოლაპარაკებები შეაჩერა.
მან ასევე დააანონსა სანქციები იმ პირების წინააღმდეგ, ვინც მდინარე იორდანეს დასავლეთ სანაპიროზე პალესტინელების წინააღმდეგ ძალადობაში მონაწილეობენ.
კირ სტარმერმა განაცხადა, რომ საფრანგეთისა და კანადის ლიდერების მსგავსად, შოკირებულია ღაზის სექტორში სამხედრო ესკალაციით.
„ჩვენ ვიმეორებთ ჩვენს მოწოდებას ცეცხლის შეწყვეტისკენ, როგორც ერთადერთ გზას მძევლების გასათავისუფლებლად. ჩვენ ვიმეორებთ, არ ვეთანხმებით დასავლეთ სანაპიროზე ისრაელის დასახლებებთან დაკავშირებულ მიდგომას და ჩვენ კვლავ მოვითხოვთ ღაზაში ჰუმანიტარული დახმარების მნიშვნელოვან გაზრდას,“ – განაცხადა დიდი ბრიტანეთის პრემიერ-მინისტრმა.
მანვე აღნიშნა, რომ აუცილებელია კოორდინირებული პასუხი, რადგან ეს ომი უკვე დიდი ხანია, გრძელდება.
კონტექსტი
ისრაელმა ღაზის სექტორში ახალი სამხედრო ოპერაცია გასულ კვირას წამოიწყო. ისრაელის პრემიერ-მინისტრის თქმით, ისრაელი ღაზის სექტორს სრულად დაიკავებს.
